– दिल्लीतील जंतर-मंतर येथील आंदोलनाला भेट देऊन दिला जाहीर पाठिंबा; केंद्र सरकारने सकारात्मक चर्चेतून मार्ग काढण्याचे केले आवाहन
कामठी :- राजधानी दिल्लीतील ऐतिहासिक जंतर-मंतर येथे विद्यार्थ्यांच्या न्याय्य हक्कांसाठी आणि उज्ज्वल भवितव्यासाठी कॉक्रोज जनता पार्टीच्या वतीने सुरू असलेल्या शांततापूर्ण आंदोलनाला मोठा राजकीय आणि सामाजिक पाठबळ मिळाले आहे. कामठीच्या लोकप्रिय नेत्या तथा माजी राज्यमंत्री ॲड. सुलेखा कुंभारे यांनी दिल्ली येथे थेट जंतर-मंतरवर आंदोलनाला भेट देऊन आपला सक्रिय आणि जाहीर पाठिंबा व्यक्त केला.
यावेळी त्यांनी आंदोलक विद्यार्थ्यांची भेट घेऊन त्यांच्या मागण्या समजून घेतल्या आणि त्यांच्या संघर्षाला बळ दिले.
“संविधानाच्या चौकटीत सुरू असलेला लढा यशस्वी होईल”
आंदोलनकर्त्यांना संबोधित करताना ॲड. सुलेखा कुंभारे म्हणाल्या की,”देशातील विद्यार्थ्यांचे भवितव्य सुरक्षित राहणे हेच राष्ट्राच्या प्रगतीचे लक्षण आहे. विद्यार्थी हे देशाचे भविष्य आहेत. संविधानाने दिलेल्या अधिकारांचा वापर करून अत्यंत शांततेच्या मार्गाने सुरू असलेल्या या आंदोलनाला माझा पूर्ण पाठिंबा आहे. विद्यार्थ्यांच्या रास्त मागण्यांची दखल त्वरित घेतली गेली पाहिजे.”
त्यांनी पुढे बोलताना केंद्र सरकारला आवाहन केले की, केंद्र सरकारने कोणत्याही प्रकारचा ताठरपणा न दाखवता आंदोलक विद्यार्थ्यांशी चर्चेच्या माध्यमातून सकारात्मक मार्ग काढावा. संविधानाचा सन्मान करत विद्यार्थ्यांच्या मागण्यांवर तातडीने तोडगा काढणे ही काळाची गरज असल्याचेही त्यांनी स्पष्ट केले.
आंदोलनस्थळी निदर्शने आणि घोषणाबाजी
जंतर-मंतर येथील वातावरण सध्या विद्यार्थ्यांच्या बुलंद आवाजाने दुमदुमून गेले आहे. ॲड. सुलेखा कुंभारे यांच्या उपस्थितीमुळे आंदोलक विद्यार्थ्यांमध्ये नवा उत्साह पाहायला मिळाला. हातामध्ये ‘भारताचे संविधान’ हे पुस्तक, डॉ. बाबासाहेब आंबेडकरांचे छायाचित्र असलेला निळा ध्वज आणि ‘जय भीम – जय भारत’च्या घोषणा देत विद्यार्थ्यांनी आपल्या मागण्यांकडे केंद्र सरकारचे लक्ष वेधण्याचा प्रयत्न केला.
याप्रसंगी आंदोलनाचे प्रमुख कार्यकर्ते, कॉक्रोज जनता पार्टीचे पदाधिकारी तसेच मोठ्या संख्येने विद्यार्थी व नागरिक उपस्थित होते. सुलेखा कुंभारे यांच्या पाठिंब्यामुळे या आंदोलनाला आता अधिक धार आली असून, केंद्र सरकार यावर काय भूमिका घेते याकडे सर्वांचे लक्ष लागले आहे.