– भंडाऱ्यातील खेडेगावातून नागपूर पर्यंतचा प्रवास; व्यवसाया सोबत सामाजिक व राजकीय क्षेत्रातही निर्माण केली वेगळी ओळख
नागपूर :- ग्रामीण भागातील एका सामान्य कुटुंबातून पुढे येत स्वकर्तृत्वाच्या बळावर स्वतःचा व्यवसाय उभा करणे आणि त्याचबरोबर सामाजिक व राजकीय क्षेत्रातही स्वतंत्र ओळख निर्माण करणे, हे प्रत्येकाला जमतेच असे नाही. मात्र, आपल्या मेहनतीने, जिद्दीने आणि समाजाप्रती असलेल्या समर्पणाच्या भावनेने हे शक्य करून दाखविणारे व्यक्तिमत्त्व म्हणजे गुणेश्वर आरीकर!
भंडारा जिल्ह्यातील एका खेडेगावातून नागपूरमध्ये आलेल्या गुणेश्वर आरीकर यांनी प्रतिकूल परिस्थितीवर मात करीत व्यवसाय क्षेत्रात स्वतःचे स्थान निर्माण केले. विशेष म्हणजे, केवळ व्यावसायिक यशावर समाधान न मानता त्यांनी सामाजिक कार्याला प्राधान्य देत समाजसंघटन आणि जनजागृतीचे कार्यही सातत्याने सुरू ठेवले आहे. त्यांच्या या कार्यामुळे सामाजिक क्षेत्रात त्यांची वेगळी ओळख निर्माण झाली आहे.
सध्या ते राष्ट्रीय ओबीसी महासंघाचे कोषाध्यक्ष असून राष्ट्रीय खैरे कुणबी समाजाचे अध्यक्ष म्हणूनही महत्त्वाची जबाबदारी सांभाळत आहेत. खैरे कुणबी समाजातील प्रत्येक जिल्ह्यातील बांधवांशी संपर्क प्रस्थापित करणे, समाजातील प्रश्न समजून घेणे, समाजबांधवांना संघटित करणे आणि संघटनेच्या माध्यमातून समाजाच्या प्रगतीसाठी प्रयत्न करणे, हे त्यांच्या कार्याचे वैशिष्ट्य आहे.
समाजाप्रती असलेली त्यांची बांधिलकी केवळ भाषणांपुरती मर्यादित नसून प्रत्यक्ष कृतीतूनही दिसून येते. गडचिरोली जिल्ह्यातील ऐतिहासिक मार्कंडा देवस्थान येथे भाविकांना महाप्रसाद वितरण करण्या सारख्या उपक्रमांतून त्यांच्या सेवाभावी वृत्तीचे दर्शन घडते. सामाजिक कार्य, धार्मिक उपक्रम आणि समाजसंघटन या तिन्ही क्षेत्रांत त्यांनी आपला सक्रिय सहभाग नोंदविला आहे.
महात्मा फुले जयंती कार्यक्रमात कार्याचा ठसा
नागपूरच्या आखाडा परिसरात राष्ट्रीय ओबीसी महासंघाच्या वतीने महात्मा ज्योतिबा फुले यांच्या जयंतीनिमित्त सहकुटुंब कार्यक्रमाचे आयोजन करण्यात आले होते. या कार्यक्रमात प्रमुख वक्त्या म्हणून प्रा. कोमल ठाकरे उपस्थित होत्या. यावेळी राष्ट्रीय ओबीसी महासंघाच्या कार्याची, संघटनात्मक वाटचालीची आणि सामाजिक उद्दिष्टांची माहिती देताना गुणेश्वर आरीकर यांनी आपले विचार प्रभावीपणे मांडले.
त्यांच्या मनोगतातून संघटनेप्रती असलेली निष्ठा, समाजाच्या प्रश्नांविषयीची तळमळ आणि संघटनात्मक कार्यासाठी घेतलेले परिश्रम प्रकर्षाने जाणवले. दहा वर्षांपूर्वी पाहिलेले गुणेश्वर आरीकर आणि आज सामाजिक क्षेत्रात कार्यरत असलेले गुणेश्वर आरीकर यांच्यातील झालेला बदल निश्चितच अचंबित करणारा आहे. त्यांच्या व्यक्तिमत्त्वात झालेली प्रगल्भता, विचारांमधील स्पष्टता आणि समाजाला दिशा देण्याची क्षमता त्यांच्या भाषणातून अधोरेखित झाली.
एखाद्या व्यक्तीचे व्यक्तिमत्त्व त्याच्या कार्यातून घडत असते. सामाजिक क्षेत्रात संघटनेसाठी सातत्याने मेहनत घेणे, समाजात जागृती निर्माण करणे आणि विविध जिल्ह्यांतील समाजबांधवांना एका व्यासपीठावर आणणे, ही साधी गोष्ट नाही. त्यासाठी वेळ, संयम, नियोजन आणि सर्वांत महत्त्वाचे म्हणजे समर्पणाची भावना आवश्यक असते. गुणेश्वर आरीकर यांनी या सर्व गुणांच्या जोरावर आपली स्वतंत्र ओळख निर्माण केली आहे.
विशेष म्हणजे, सामाजिक आणि संघटनात्मक जबाबदाऱ्या सांभाळतानाच त्यांनी आपल्या व्यवसायाकडेही तितक्याच मेहनतीने लक्ष दिले आहे. व्यवसाय आणि समाजकार्य यांचा समतोल साधत दोन्ही क्षेत्रांत सक्रिय राहणे, हे त्यांच्या कार्यशैलीचे प्रेरणादायी वैशिष्ट्य आहे.
खैरे कुणबी समाजासाठी आश्वासक नेतृत्व
खैरे कुणबी समाजाचे भूषण म्हणून गुणेश्वर आरीकर यांच्याकडे पाहिले जात आहे. समाजातील बांधवांना जोडण्याची त्यांची हातोटी, संघटनेला बळकटी देण्याची जिद्द आणि सामाजिक प्रश्नांवर सकारात्मक भूमिका घेण्याची वृत्ती पाहता भविष्यात सामाजिक व राजकीय क्षेत्रात उदयास येणारे एक प्रभावी नेतृत्व म्हणून त्यांच्याकडे पाहण्यास हरकत नाही.
त्यांच्या कार्याची दखल घेऊन अँड. अभय जिकार व परिवार यांनी गुणेश्वर आरीकर यांचे विशेष कौतुक केले. त्यांच्या पुढील वाटचालीस मनःपूर्वक शुभेच्छा देताना, त्यांच्या हातून खैरे कुणबी समाजासह संपूर्ण ओबीसी समाजाच्या उन्नतीसाठी अधिकाधिक विधायक कार्य घडावे, अशी सदिच्छा व्यक्त केली.






