कामठी :- जुनी कामठी पोलीस ठाण्याच्या हद्दीत दहशत निर्माण करणाऱ्या आणि घरफोडीच्या गुन्ह्यात सराईत असलेल्या सचिन उर्फ वांग्या राकेश कुंबरे (२८, रा. बैल बाजार, दुर्गा चौक, कामठी) याच्यावर नागपूर शहर पोलिसांनी एमपीडीए कायद्यांतर्गत कठोर कारवाई केली आहे. सातत्याने गुन्हेगारी कृत्यांमध्ये लिप्त असलेल्या या आरोपीला एक वर्षासाठी स्थानबद्ध करण्याचे आदेश पोलीस आयुक्तांनी जारी केले आहेत.
२७ घरफोड्यांचा रेकॉर्ड
मिळालेल्या माहितीनुसार, आरोपी सचिन उर्फ वांग्या हा अट्टल गुन्हेगार असून त्याच्यावर नागपूर शहरातील विविध पोलीस ठाण्यांमध्ये तब्बल २७ घरफोडीचे गुन्हे नोंद आहेत. चोरी आणि घरफोडीच्या माध्यमातून त्याने सर्वसामान्य नागरिकांमध्ये भीतीचे वातावरण निर्माण केले होते. स्वतःचा वचक प्रस्थापित करण्यासाठी तो वारंवार कायद्याचे उल्लंघन करत होता.
हद्दपारीनंतरही वर्तनात सुधारणा नाही
यापूर्वी देखील पोलिसांनी त्याच्यावर प्रतिबंधात्मक पाऊल म्हणून हद्दपारीची कारवाई केली होती. मात्र, शहराबाहेर काढूनही त्याच्या वर्तनात कोणतीही सुधारणा झाली नाही. हद्दपारीचा कालावधी संपताच किंवा त्यादरम्यान त्याने पुन्हा गुन्हेगारी कृत्ये सुरू ठेवली, ज्यामुळे सार्वजनिक शांततेस बाधा निर्माण होत होती.
पोलीस आयुक्तांचा कडक प्रहार
आरोपीच्या वाढत्या गुन्हेगारी कारवायांना लगाम घालण्यासाठी जुनी कामठी पोलिसांनी त्याच्याविरुद्ध एमपीडीए अंतर्गत कारवाईचा प्रस्ताव सादर केला होता. या प्रस्तावाची गांभीर्याने दखल घेत, नागपूर शहर पोलीस आयुक्तांनी सचिन उर्फ वांग्याला एक वर्षासाठी स्थानबद्ध करण्याचे आदेश दिले. या कारवाईमुळे कामठी परिसरातील गुन्हेगारांमध्ये मोठी खळबळ उडाली आहे.
