नागपूर :- नागपूर महानगरपालिकेद्वारा इंटिग्रेटेड इंटेलिजेंट ट्रॅफिक मॅनेजमेंट सिस्टम अर्थात आयआयटीएमएस या अत्याधुनिक एआयचा वापर सुरळीत वाहतूक व्यवस्थेसाठी केला जाणार आहे. या प्रकल्पाचा मनपा आयुक्त तथा प्रशासक डॉ. अभिजीत चौधरी यांनी पोलिसांच्या कमांड कंट्रोल सेंटर आणि लेडीज क्लब चौकातील आयआयटीएमएस प्रणालीच्या कार्याचा मंगळवारी (ता.२०) आढावा घेतला.
याप्रसंगी मनपाच्या अतिरिक्त आयुक्त वैष्णवी बी. मनपाचे कार्यकारी अभियंता राजेंद्र राठोड, सहायक अभियंता भस्मे, कनिष्ठ अभियंता रजत माळी, सागर मलावी, आशिष पटेल, अजय रामटेके यांच्यासह मनपाचे इतर अधिकारी आणि कर्मचारी उपस्थित होते.
मनपाद्वारे शहरातील १७१ ठिकाणी इंटिग्रेटेड इंटेलिजेंट ट्रॅफिक मॅनेजमेंट सिस्टम अर्थात आयआयटीएमएस तयार करण्यात येत आहे. त्याकरिता कमांड कंट्रोल सेंटर येथे सर्व्हर बसविण्यात येणार असून, सायबर सुरक्षेच्या दृष्टीने हे सर्व्हर अत्याधुनिक आहे. या प्रणालीची आयुक्तांनी पाहणी केले. आयुक्तांनी कमांड कंट्रोल सेंटर मधील एनओसी रूम, बटरी रूम, सर्व्हेलांस रूमची देखील पाहणी केली. नंतर आयुक्तांनी लेडीज क्लब चौक जंक्शनवर बसविण्यात येणाऱ्या आयआयटीएमएस प्रणालीच्या कार्याचा प्रत्यक्ष आढावा घेतला. यावेळी त्यांनी आवश्यक ते निर्देश दिले.
वाहन चालविताना नागरिकांकडून होणारे वाहतूक नियमांची उल्लंघन होत असल्यास आयआयटीएमएस प्रणाली प्रत्यक्ष कसे कार्य करते हे त्यांनी जाणून घेतले. यावेळी मनपा आयुक्त यांनी विविध जंक्शनवरील वाहनाची संख्या, विविध वाहतूक नियमांचे उल्लंघन, रीअल टाईमिंग, ग्रीन कॉरीडॉर, सिग्नल टायमिंग आणि डेटा स्टोरेज याबाबत माहिती जाणून घेतली.