हंसराज भंडारा : भारत निवडणूक आयोगाने नागपूर विभाग पदवीधर मतदारसंघ निवडणूक-2026 चा कार्यक्रम जाहीर केला असून, संबंधित निवडणूक क्षेत्रात आदर्श आचारसंहिता लागू झाली आहे. या पार्श्वभूमीवर दि. 29 सप्टेंबर 2026 रोजी आयोजित करण्यात आलेला रोजगार महाकुंभ पुढील आदेशापर्यंत तात्पुरत्या स्वरूपात स्थगित करण्यात आला आहे.

रोजगार महाकुंभाची नवीन तारीख व वेळ निश्चित झाल्यानंतर संबंधित महाविद्यालये, उमेदवार व इतर संबंधितांना स्वतंत्रपणे कळविण्यात येणार आहे. या अनुषंगाने सर्व संबंधित महाविद्यालयांनी रोजगार मेळाव्याच्या आयोजनासाठी करण्यात येणारी प्रसिद्धी, उमेदवारांची नोंदणी, उमेदवारांना उपस्थित राहण्याबाबतची कार्यवाही तसेच इतर सर्व तयारी पुढील आदेशापर्यंत तात्पुरती स्थगित ठेवावी.

रोजगार महाकुंभासाठी नोंदणी केलेल्या नोकरीइच्छुक उमेदवारांनी याची नोंद घ्यावी, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्र, भंडारा यांच्यामार्फत करण्यात आले आहे.

– वस्तीस्तरावर शिबिरांचे आयोजन; पात्र लाभार्थींनी सहभागी होण्याचे आवाहन

हंसराज,भंडारा :- विमुक्त जाती व भटक्या जमातीतील नागरिकांना त्यांचे मूलभूत अधिकार, आवश्यक शासकीय प्रमाणपत्रे तसेच विविध शासकीय योजनांचे लाभ सुलभतेने मिळावेत, यासाठी राज्य शासनाच्या वतीने दि. २७, २८ व २९ सप्टेंबर २०२६ या कालावधीत विशेष ‘भटके-विमुक्त हक्क व प्रमाणपत्र अभियान’ राबविण्यात येणार आहे. भंडारा जिल्ह्यात हे अभियान वस्तीस्तरापर्यंत प्रभावीपणे राबविण्यात येणार असून, एकही पात्र लाभार्थी आवश्यक प्रमाणपत्रे व शासकीय योजनांच्या लाभापासून वंचित राहू नये, यासाठी प्रशासनाने नियोजन केले आहे.

ब्रिटिशकालीन १८७१ च्या कायद्यानुसार ‘गुन्हेगार जमात’ अशी करण्यात आलेली ओळख १९५२ मध्ये संपुष्टात आणून या समुदायांना ‘विमुक्त जाती’ म्हणून घोषित करण्यात आले. भटक्या जीवनशैलीमुळे या समाजातील नागरिकांना विविध शासकीय योजनांचा लाभ घेताना येणाऱ्या अडचणी लक्षात घेऊन आवश्यक ओळखपत्रे व प्रमाणपत्रे मिळण्याची प्रक्रिया सुलभ करण्याच्या उद्देशाने हे विशेष अभियान आयोजित करण्यात आले आहे.

अभियानाच्या यशस्वी अंमलबजावणीसाठी जिल्हाधिकारी, उपविभागीय अधिकारी व तहसीलदार यांच्या समन्वयाने इतर मागास बहुजन कल्याण विभागामार्फत तालुकानिहाय विशेष शिबिरांचे आयोजन करण्यात आले आहे.

तालुकानिहाय शिबिरांचे वेळापत्रक

भंडारा तालुका :

दि. २७ ते २९ सप्टेंबर – ग्रामपंचायत कार्यालय, आंबाडी; सोनझरी टोली भोजापूर आणि मेंढा वस्ती.

लाखनी तालुका :

दि. २७ व २९ सप्टेंबर – मंडळ कार्यालय, शहापूर.

दि. २८ सप्टेंबर – शिवाजी जिल्हा परिषद शाळा, पिंपळगाव.

साकोली तालुका :

दि. २७ सप्टेंबर – समाज मंदिर, पटाची दान, साकोली.

दि. २८ सप्टेंबर – समाज मंदिर, सुंदरी (चारगाव).

दि. २९ सप्टेंबर – बिरसा मुंडा स्मारक सभागृह, खैरी.

लाखांदूर तालुका :

दि. २७ सप्टेंबर – स्थानिक वस्ती, चोरखमारी.

दि. २८ सप्टेंबर – जिल्हा परिषद प्राथमिक शाळा, कोदामेडी.

दि. २९ सप्टेंबर – जिल्हा परिषद प्राथमिक शाळा, कन्हाळगाव.

पवनी तालुका :

दि. २७ सप्टेंबर – तहसील कार्यालय, पवनी.

दि. २८ सप्टेंबर – ग्रामपंचायत कार्यालय, वाही.

दि. २९ सप्टेंबर – ग्रामपंचायत कार्यालय, सावरला.

मोहाडी तालुका :

दि. २७ सप्टेंबर – ग्रामपंचायत कार्यालय, बिडसितेपार.

दि. २८ सप्टेंबर – ग्रामपंचायत कार्यालय, मोहगाव बु.

दि. २९ सप्टेंबर – ग्रामपंचायत कार्यालय, कांद्री.

तुमसर तालुका :

दि. २८ सप्टेंबर – ग्रामपंचायत कार्यालय, लंझेरा.

दि. २९ सप्टेंबर – तहसील कार्यालय, तुमसर.

शेवटच्या घटकापर्यंत योजनांचा लाभ पोहोचविण्याचा प्रयत्न

“शासकीय योजना आणि भटके-विमुक्त समाजातील शेवटच्या घटकातील नागरिक यांच्यातील दुवा म्हणून हे अभियान यशस्वी करायचे आहे,” असे इतर मागास बहुजन कल्याण विभाग, भंडाराचे सहाय्यक संचालक डॉ. सचिन मडावी यांनी सांगितले.

या विशेष अभियानाच्या माध्यमातून पात्र नागरिकांना आवश्यक प्रमाणपत्रे व शासकीय योजनांची माहिती तसेच लाभ मिळवून देण्यासाठी प्रशासनाकडून प्रयत्न करण्यात येणार आहेत. त्यामुळे भटके-विमुक्त समाजातील जास्तीत जास्त नागरिकांनी आपल्या जवळच्या शिबिरात उपस्थित राहून उपलब्ध सुविधांचा लाभ घ्यावा, असे आवाहन डॉ. मडावी यांनी केले आहे

– प्रवासी व व्यापारी वर्गाची गैरसोय दूर करा; पालकमंत्री डॉ. पंकज भोयर यांच्यामार्फत रेल्वे प्रशासनाला निवेदन

हंसराज,भंडारा तुमसर :- तुमसर रोड आणि भंडारा रोड जंक्शन येथे प्रवासी, नोकरदार, व्यापारी तसेच  विद्यार्थ्यांची होणारी गैरसोय लक्षात घेता, या दोन्ही प्रमुख स्थानकांवर लांब पल्ल्याच्या जलद गाड्यांना थांबा देण्यात यावा, अशी जोरदार मागणी जोर धरत आहे. या संदर्भात देव्हाडी-परसवाडा येथील सतीश शेंडे, जयचंद पारधी व प्रवाशांच्या शिष्टमंडळाने जिल्ह्याचे पालकमंत्री डॉ. पंकज भोयर यांच्यामार्फत केंद्रीय रेल्वे प्रशासन व केंद्रीय मंत्री नितीन गडकरी यांना सविस्तर निवेदन सादर केले आहे.

सादर निवेदनात नमूद केल्यानुसार, मुंबई–हावडा मार्गावरील प्रसिद्ध ‘गीतांजली एक्सप्रेस’, ‘उधना ब्रह्मपूर एक्सप्रेस’ आणि ‘अमृतसर भारत एक्सप्रेस’ या गाड्यांना तुमसर रोड व भंडारा रोड रेल्वे स्थानकांवर तातडीने थांबा देण्यात यावा. नागपूर–भंडारा–गोंदिया मार्गावर नियमित प्रवास करणारे दुग्ध व्यावसायिक, विद्यार्थी, कामगार व नोकरदार वर्गासाठी रात्री २:३० ते पहाटे ३:३० या कालावधीत कोणतीही पर्यायी रेल्वे उपलब्ध नाही. यामुळे प्रवाशांची प्रचंड तारांबळ उडत असून या वेळेत थांबा दिल्यास सर्वसामान्य प्रवाशांना मोठा दिलासा मिळणार आहे.

तुमसर रोड जंक्शनवरून तिरोडी, बालाघाट व जबलपूरकडे रेल्वे मार्ग विस्तारलेला असून येथून रेल्वेला दररोज लाखो रुपयांचा महसूल मिळतो. आशिया खंडातील सर्वात मोठी तांदळाची बाजारपेठ म्हणून तुमसरची ओळख आहे. याशिवाय परिसरातील चिखला व डोंगरी बु. येथील मॅग्नीज खाणी, वरठी येथील सनफ्लॅग पोलाद प्रकल्प, जवाहरनगरची ऑर्डनन्स फॅक्टरी, गोसेखुर्द प्रकल्प तसेच चांदपूर देवस्थान व आंबागड किल्ला या पर्यटन स्थळांमुळे या दोन्ही स्थानकांना मोठे औद्योगिक व व्यापारी महत्त्व आहे. केंद्र सरकारच्या ‘अमृत भारत स्टेशन योजने’त या दोन्ही स्थानकांचा समावेश असूनही प्रमुख गाड्यांना थांबा नसल्याने संताप व्यक्त होत आहे.

या मागण्यांची दखल घेत रेल्वे प्रशासनाने तात्काळ थांबा मंजूर करावा, अशी मागणी करण्यात आली आहे. सदर निवेदनाच्या प्रती केंद्रीय मंत्री नितीन गडकरी, खासदार प्रफुल्ल पटेल, जिल्ह्याचे पालकमंत्री डॉ. पंकज भोयर, माजी पालकमंत्री डॉ. परिणय फुके, तुमसर-मोहाडी विधानसभा क्षेत्राचे आमदार राजू कारेमोरे तसेच विभागीय रेल्वे व्यवस्थापक (DRM, मध्य रेल्वे नागपूर) यांना पाठविण्यात आल्या आहेत. हे निवेदन सादर करताना भाजप जिल्हाध्यक्ष आशुतोष गोंडाने, सचिन कुंभलकर , मदनकर, सतीश शेंडे, जयचंद पारधी उपस्थित होते.

वर्धा :- राज्यातील औद्योगिक क्षेत्राला नवी ऊर्जा देण्यासाठी आणि उद्योगांना विनाव्यत्यय, उच्च दर्जाचा व सुरक्षित वीजपुरवठा सुनिश्चित करण्यासाठी महावितरण प्रशासन कटिबद्ध आहे. याच धोरणाचा एक भाग म्हणून महावितरण वर्धा मंडळाच्या वतीने शुक्रवारी (दि. 25 सप्टेंबर) ‘स्वागत कक्ष’ समिती आणि स्थानिक उद्योजकांची बैठक पार पडली. महावितरण वर्धा मंडळाच्या अधीक्षक अभियंता स्मीता पारखी यांच्या प्रमुख उपस्थितीत व अध्यक्षतेखाली मंडळ कार्यालयात ही बैठक संपन्न झाली.

महाराष्ट्र शासनाच्या औद्योगिक धोरणास अनुसरून आयोजित या बैठकीचा मुख्य उद्देश महावितरण आणि स्थानिक उद्योग जगतामधील थेट संवाद अधिक दृढ करणे हा होता. या बैठकीमध्ये वर्धा, आर्वी आणि हिंगणघाट या तिन्ही विभागांतील प्रमुख वीज समस्या, तांत्रिक अडचणी, नवीन वीजजोडणीचे प्रलंबित अर्ज, पायाभूत सुविधांचा विस्तार आणि बिलिंगविषयक महत्त्वाच्या मुद्द्यांवर सविस्तर व सकारात्मक चर्चा करण्यात आली. महावितरणच्या अधिकाऱ्यांनी उद्योजकांच्या अडचणी प्रत्यक्ष समजून घेत त्यावर तातडीने आणि कायमस्वरूपी तोडगा काढण्याचे आश्वासन दिले.

या बैठकीस वर्धा, आर्वी आणि हिंगणघाट विभागांचे वरिष्ठ महावितरण अधिकारी, कार्यकारी अभियंते, तांत्रिक पथकांचे प्रतिनिधी तसेच जिल्ह्यातील प्रमुख औद्योगिक वसाहतींमधील उद्योजक, व्यावसायिक आणि विविध औद्योगिक संघटनांचे प्रतिनिधी मोठ्या संख्येने उपस्थित होते. उद्योगांना अखंडित वीज मिळाल्यास उत्पादनात वाढ होऊन स्थानिक पातळीवर रोजगाराच्या नवीन संधी उपलब्ध होतील, असा विश्वास याप्रसंगी व्यक्त करण्यात आला.

महावितरणने घेतलेल्या या उद्योगस्नेही आणि तत्पर भूमिकेचे उपस्थितांनी मनापासून कौतुक केले. वीजविषयक अडचणींचे अशा प्रकारे थेट संवादातून वेळेत निवारण होत असल्याने स्थानिक उद्योजकांनी समाधान व्यक्त केले असून महावितरणच्या या ग्राहककेंद्री पुढाकाराचे सर्व स्तरांतून जोरदार स्वागत केले जात आहे.

वर्धा :- वीजग्राहकांना अत्यंत वेगवान, अत्यंत पारदर्शक आणि सुलभ सेवा पुरवून त्यांच्या चेहऱ्यावर समाधान फुलवण्यासाठी महावितरणने राज्यभरात सुरू केलेल्या ‘सेवा सेतू’ आणि ‘सेवा संकल्प अभियाना’ला वर्धा जिल्ह्यात नागरिकांचा अभूतपूर्व आणि उत्साहवर्धक प्रतिसाद मिळत आहे. मुख्यमंत्री यांचे अपर मुख्य सचिव तथा महावितरणचे अध्यक्ष व व्यवस्थापकीय संचालक लोकेश चंद्र यांच्या गतिमान नेतृत्वाखाली 17 सप्टेंबरपासून राज्यभरात धडाक्यात सुरू झालेले हे अभियान येत्या 17 ऑक्टोबर 2026 पर्यंत चालणार आहे. जिल्हयातील प्रत्येक तालुक्यात विशेष सेवा कक्ष उभारून महावितरणने सर्व प्रकारच्या पारंपरिक वीज आणि आधुनिक सौर सेवा एकाच छताखाली उपलब्ध करून देत ग्राहकांसाठी सुशासनाचा आदर्श निर्माण केला आहे.

याच पार्श्वभूमीवर सेलू येथील तहसील कार्यालयात उभारण्यात आलेल्या महावितरणच्या विशेष कक्षाला तहसीलदार शकुंतला परांजपे यांनी भेट देऊन उपक्रमाचे कौतुक केले. याप्रसंगी सेलूचे उपकार्यकारी अभियंता वाटकर, हिंगणा येथील कनिष्ठ अभियंता कपूर आणि केलझर येथील कनिष्ठ अभियंता भलमे यांनी त्यांना अभियानाची सविस्तर माहिती दिली.

ग्रामीण व शहरी भागात अभियानाचा झंझावात पाहायला मिळत असून आष्टी नगर परिषदेच्या प्रांगणात उभारलेल्या कक्षात ‘पीएम सूर्यघर मोफत वीज योजना’, ‘स्मार्ट’ योजना, ‘मागेल त्याला सौर कृषी पंप योजना’ आणि ‘मुख्यमंत्री सौर कृषी वाहिनी योजना २.०’ यांसारख्या क्रांतिकारी योजनांचे मार्गदर्शन केले जात आहे. खरांगना उपविभागातील आठवडी बाजार व ग्रामपंचायत परिसरात आयोजित शिबिरांना नागरिकांनी गर्दी केली होती. येथे केवळ ऑनलाईन अर्ज किंवा माहितीच नाही, तर सौर संच बसवण्यासाठी लागणारे कर्ज सहज मिळावे म्हणून स्थानिक बँक प्रतिनिधी आणि सौर कंत्राटदारांना एकाच ठिकाणी उपस्थित ठेवून थेट समन्वयाची उत्तम सोय करण्यात आली आहे.

दुसऱ्या बाजूला ‘सेवा सेतू अभियाना’द्वारे नवीन वीजजोडणी, नादुरुस्त रोहित्र (ट्रांसफॉर्मर) विनाविलंब बदलणे, बिलावरील नाव बदलणे आणि बिलिंगच्या तक्रारींचे थेट जागेवरच चुटकीसरशी निवारण केले जात आहे. तसेच वीज यंत्रणेची देखभाल-दुरुस्ती आणि विद्युत सुरक्षेच्या उपाययोजनांना प्राधान्य देऊन महावितरणने ग्राहकांसाठी सुरक्षित व अखंड वीजपुरवठ्याची खात्री दिली आहे. सर्व सुविधा एकाच ठिकाणी सहज उपलब्ध होत असल्याने महावितरणच्या या ग्राहककेंद्री आणि सेवाभावी उपक्रमाचे सर्वत्र जोरदार स्वागत होत आहे.

नागपूर :- ज्येष्ठ राजकारणी, अखंड मानवतावाद (एकात्म मानववाद) विचारसरणीचे समर्थक, लेखक, पत्रकार व संघटक पंडित दीनदयाळ उपाध्याय यांच्या जयंतीनिमित्त महावितरणतर्फ़े त्यांना अभिवादन करण्यात आले.

महावितरण नागपुर परिमंडलाच्या काटोल मार्गावरील विद्युत भवन या प्रशासकीय मुख्यालयात मुख्य अभियंता राजेश नाईक यांनी पंडित दीनदयाळ उपाध्याय यांच्या प्रतिमेला माल्यार्पण करुन अभिवादन केले. यावेळी अधीक्षक अमित परांजपे, सहायक महाव्यवस्थापक (मानव संसाधन) महेश जाधव, कार्यकारी अभियंता अमित शिवलकर, वरिष्ठ व्यवस्थापक (वित्त व लेखा) सुधीर टेकाम, उपमुख्य औद्योगिक संबंध अधिकारी सचिन लहाने, उपमुख्य जनसंपर्क अधिकारी योगेश विटनकर, यांसह अनेक अधिकारी आणि कर्मचाऱ्यांनी पंडित दीनदयाळ उपाध्याय यांना आदराने अभिवादन केले.