– अर्जुनी मोरगाव तालुक्यातील शेतकऱ्यांची मागणी; बोनसच्या प्रतीक्षेने शेतकरी नाराज
पंकज परशुरामकर नवेगाव बांध :- संपूर्ण महाराष्ट्रात दुष्काळसदृश परिस्थिती असली, तरी गोंदिया जिल्ह्यातील अनेक भागांत यंदा धान पिकाची स्थिती चांगली असल्याचा दावा करीत, शेतकऱ्यांना दुष्काळाच्या मदतीऐवजी त्यांच्या हक्काचा धान बोनस दिवाळीपूर्वी देण्यात यावा, अशी मागणी अर्जुनी मोरगाव तालुक्यातील शेतकरी बांधवांकडून केली जात आहे. ‘आम्हाला दुष्काळाची भीक नको, आमच्या हक्काचे धान बोनसचे पैसे दिवाळीपूर्वी द्या,’ अशी भूमिका शेतकऱ्यांनी मांडली आहे.
गोंदिया जिल्हा हा धान उत्पादक जिल्हा म्हणून ओळखला जातो. यंदा अर्जुनी मोरगाव तालुक्यातील तलाव शंभर टक्के भरले असून, धान पिकाची स्थितीदेखील चांगली असल्याचे शेतकऱ्यांचे म्हणणे आहे. अशा परिस्थितीत जिल्हा दुष्काळग्रस्त घोषित करण्याच्या निर्णयामागे राजकीय फायदा लक्षात घेतला जात असल्याचा आरोप काही शेतकरी करीत आहेत. या निर्णयामुळे शेतकऱ्यांच्या मूळ प्रश्नांकडे दुर्लक्ष होत असल्याची भावना शेतकरी वर्गातून व्यक्त केली जात आहे.
दिवाळी हा शेतकरी कुटुंबांसाठी आनंदाचा आणि आर्थिक गरजा पूर्ण करण्याचा महत्त्वाचा सण आहे. शेतीसाठी केलेला खर्च, कुटुंबाच्या गरजा आणि सणासुदीच्या खर्चाचा ताळमेळ घालताना शेतकऱ्यांना आर्थिक अडचणींचा सामना करावा लागतो. अशा वेळी धान बोनसची रक्कम वेळेत मिळाल्यास शेतकऱ्यांना मोठा दिलासा मिळू शकतो. त्यामुळे शासनाने शेतकऱ्यांच्या मागणीची दखल घेऊन बोनसची रक्कम दिवाळीपूर्वी खात्यात जमा करावी, अशी अपेक्षा व्यक्त होत आहे.
शेतकऱ्यांना दुष्काळाच्या नावाखाली मदत जाहीर करण्यापेक्षा त्यांच्या हक्काच्या धान बोनसबाबत ठोस निर्णय घेऊन प्रत्यक्ष लाभ द्यावा, अशी मागणी तालुक्यातील शेतकरी बांधवांकडून होत आहे. शासन आणि लोकप्रतिनिधींनी शेतकऱ्यांच्या भावनांचा विचार करून दिवाळीपूर्वी बोनस देण्याबाबत तातडीने पावले उचलावीत, अन्यथा शेतकऱ्यांमधील नाराजी आणखी वाढण्याची शक्यता व्यक्त केली जात आहे.
