spot_imgspot_img

Latest News

spot_img

Related Posts

रॉकेट आणि आकाशात उडणाऱ्या फटाक्यांवर बंदी

– पुणे महापालिका आयुक्तांचा आदेश

पुणे :- दिवाळी आणि त्यानंतरच्या काळात फटाक्यांमुळे आग लागण्याच्या घटना तसेच नागरिकांच्या जीविताला आणि मालमत्तेला निर्माण होणारा धोका लक्षात घेऊन पुणे शहरात रॉकेट आणि तत्सम आकाशात उडणाऱ्या फटाक्यांच्या वापरावर पूर्णतः बंदी घालण्यात आली आहे. पुणे पालिका आयुक्त तथा शहरी आपत्ती व्यवस्थापन प्राधिकरणाचे अध्यक्ष नवल किशोर राम यांनी याबाबत आदेश दिले आहेत.

शहर महापालिका हद्दीत फटाक्यांमुळे आग लागण्याच्या अनेक घटना निदर्शनास आल्या आहेत. विशेषतः रॉकेट तत्सम आकाशात उडणारे फटाके उडविताना ते इमारतींच्या छतांवर, बाल्कनीमध्ये, खिडक्यांमध्ये तसेच मोकळ्या जागेत पडण्याची शक्यता असते. यामुळे गवत, झाडे आणि ज्वलनशील साहित्याला आग लागण्याचा धोका निर्माण होतो. अशा घटनांमुळे नागरिकांच्या जीवितासह मालमत्तेलाही गंभीर धोका संभवतो.

काही नागरिकांकडून रॉकेट आणि तत्सम फटाके हातात धरून धोकादायक पद्धतीने उडविले जात असल्याचेही निदर्शनास आले आहे. अशा प्रकारच्या कृतींमुळे आगीच्या दुर्घटना घडण्याची आणि कायदा व सुव्यवस्थेचा प्रश्न निर्माण होण्याची शक्यता असल्याने सार्वजनिक सुरक्षिततेच्या दृष्टीने प्रतिबंधात्मक उपाययोजना करणे आवश्यक असल्याचे आदेशात नमूद करण्यात आले आहे.

संपूर्ण महापालिका हद्दीत बंदी लागू

या आदेशानुसार पुणे महानगरपालिका हद्दीतील रॉकेट आणि तत्सम आकाशात उडणाऱ्या फटाक्यांचा वापर पूर्णतः प्रतिबंधित करण्यात आला आहे. ही बंदी केवळ सार्वजनिक ठिकाणांपुरती मर्यादित नसून खासगी जागा, निवासी इमारती, इमारतींचे टेरेस, गच्ची, बाल्कनी, अंगण, वाहनतळ, झोपडपट्टी क्षेत्र तसेच इतर सर्व परिसरांनाही लागू राहणार आहे.त्यामुळे घराच्या गच्चीवर, बाल्कनीत किंवा खासगी जागेतही अशा प्रकारचे फटाके उडविता येणार नाहीत. हा आदेश लागू झाल्यापासून २५ नोव्हेंबर २०२६ रोजी रात्री ११.५९ वाजेपर्यंत त्याची अंमलबजावणी होणार आहे.

आपत्ती व्यवस्थापन कायद्यानुसार आदेश

रॉकेट आणि तत्सम आकाशात उडणाऱ्या फटाक्यांव्यतिरिक्त इतर फटाक्यांचा वापर हा प्रचलित कायदे, सक्षम प्राधिकरणांचे आदेश आणि न्यायालयाने वेळोवेळी दिलेल्या निर्देशांच्या अधीन राहणार आहे. त्यामुळे सर्व प्रकारच्या फटाक्यांवर सरसकट बंदी घालण्यात आलेली नसून, विशेषतः रॉकेट आणि तत्सम आकाशात उडणाऱ्या फटाक्यांवर प्रतिबंध घालण्यात आला आहे.

Popular Articles