पांढरकवडा :- केळापूर तालुक्यात घरकुल योजनेच्या अंमलबजावणीदरम्यान कथित गैरव्यवहार झाल्याच्या तक्रारीनंतर प्रशासनाने चौकशी समिती नेमली होती. या समितीने प्रत्यक्ष पाहणी व संबंधित कागदपत्रांची तपासणी करून अहवाल सादर करण्याची प्रक्रिया सुरू केली असली तरी, चौकशीचा अंतिम अहवाल नेमका कधी सार्वजनिक होणार? याकडे तालुक्यातील नागरिकांचे लक्ष लागले आहे.
तालुक्यातील काही गावांमध्ये पात्र लाभार्थ्यांना घरकुल योजनेचा लाभ मिळाला नसल्याच्या, तर काही ठिकाणी घरांचे बांधकाम अपूर्ण असतानाही अनुदानाची रक्कम वितरित झाल्याच्या तक्रारी पुढे आल्या आहेत. काही प्रकरणांमध्ये प्रत्यक्ष स्थळपाहणी न करता कागदोपत्री पूर्तता करण्यात आल्याचा आरोपही करण्यात आला आहे. या सर्व बाबींची सत्यता चौकशीअंती स्पष्ट होणे अपेक्षित आहे.
या प्रकरणाच्या पार्श्वभूमीवर चौकशी समितीने संबंधित ग्रामपंचायतींचे अभिलेख, लाभार्थी यादी, मंजुरी आदेश, अनुदान वितरणाची माहिती तसेच प्रत्यक्ष बांधकामाची स्थिती तपासणे महत्त्वाचे ठरणार आहे. चौकशीत अनियमितता आढळल्यास संबंधित जबाबदार अधिकारी, कर्मचारी किंवा इतर संबंधित व्यक्तींवर नियमानुसार कारवाई होणार का, याचीही उत्सुकता नागरिकांमध्ये आहे.
चौकशी समितीचा अहवाल पारदर्शकपणे जाहीर करावा, अशी मागणी नागरिकांकडून होत आहे. अहवालात दोष आढळल्यास केवळ कागदोपत्री कारवाई न करता शासनाच्या निधीचा अपव्यय झाल्याचे निष्पन्न झाल्यास संबंधितांकडून रक्कम वसूल करावी, तसेच पात्र लाभार्थ्यांना त्यांचा हक्काचा लाभ मिळवून द्यावा, अशी अपेक्षा व्यक्त होत आहे.
घरकुल योजना ही आर्थिकदृष्ट्या गरजू कुटुंबांना हक्काचे घर मिळवून देण्यासाठीची महत्त्वाची योजना आहे. त्यामुळे या योजनेतील प्रत्येक रुपया योग्य लाभार्थ्यापर्यंत पोहोचणे आवश्यक आहे. चौकशी समितीचा अहवाल विलंब न करता सार्वजनिक करून दोषींवर कठोर कारवाई आणि पात्र लाभार्थ्यांना न्याय मिळवून द्यावा, अशी मागणी आता जोर धरत आहे.
दरम्यान, चौकशी समितीच्या अहवालात नेमके काय निष्पन्न होते आणि प्रशासन त्यावर कोणती भूमिका घेते, याकडे केळापूर तालुक्यातील नागरिकांचे लक्ष लागले आहे.