मुंबई 30 – हिंदी सक्तीचा निर्णय मागे घेतल्याने राज्य सरकार ठाकरे बंधूंच्या ताकदीपुढे झुकल्याचे स्पष्ट झाले आहे. ठाकरे बंधू एकत्र आल्यावर निर्माण होणाऱ्या मराठी ताकदीच्या भूकंपाच्या भीतीनेच सरकारने पायउतार व्हायचा निर्णय घेतला, असे प्रतिपादन उद्धव सेनेचे खासदार संजय राऊत यांनी केले. हा केवळ विजयाचा प्रारंभ असून, यापुढेही अशा लढ्यांत सरकारला माघार घ्यावी लागेल, असा विश्वास त्यांनी व्यक्त केला. संजय राऊत म्हणाले, “जेव्हा राज ठाकरे यांनी एकत्र येण्याचे आवाहन केले, त्यानंतर अवघ्या १० मिनिटांत उद्धव ठाकरे यांनी सकारात्मक प्रतिसाद दिला. मराठीच्या प्रत्येक लढ्यात ठाकरे बंधू एकत्र असतील. मुंबईसह महाराष्ट्राची सत्ता मराठी माणसांच्या हाती यावी ही आमची इच्छा आहे.”

ते पुढे म्हणाले, “जर फडणवीस-प्रफुल पटेल, फडणवीस-शिंदे, फडणवीस-हसन मुश्रीफ एकत्र येऊ शकतात, तर दोन भाऊ एकत्र आल्यावर पोटदुखी का होते? एकाच विचाराचे नेते एकत्र आल्यावर तुम्ही वैफल्यग्रस्त होत आहात. कधीकाळी शिंदे फडणवीसांना भ्रष्टाचारी म्हणत होते, तर फडणवीस अजित पवारांना तुरुंगात टाकण्याची भाषा करत होते. त्यामुळे भूतकाळाची आठवण करून देऊ नका. येणाऱ्या काळात कोण पुढे जाते, हे स्पष्ट होईल.” राऊतांनी स्पष्ट केले की, हिंदी सक्तीचा निर्णय मागे घेणे हा फडणवीसांचा शहाणपणाचा पहिलाच निर्णय आहे. ठाकरे बंधू एकत्र आले, मोर्चाची घोषणा झाली आणि त्यानंतर सरकारने निर्णय मागे घेतला. लाखो मराठी लोक मोर्चासाठी एकत्र येणार होते, हे लक्षात घेऊनच सरकारने धसका घेतला. त्रिभाषा सूत्र आम्ही मान्य करणार नाही. दोन ठाकरे बंधूंच्या स्पष्ट भूमिकेमुळे सरकारने ‘समितीचा खेळ’ बंद केला पाहिजे.

५ जुलैचा विजयी जल्लोष

५ जुलैला होणाऱ्या विजयी मेळाव्यावर संजय राऊत म्हणाले की, राज आणि उद्धव ठाकरे यांचे एकत्र येणे हे महाराष्ट्रासाठी मोठे आकर्षण आहे. त्यामुळेच सरकारने हिंदी सक्तीबाबतचा अध्यादेश मागे घेतला. मोर्चाची तयारी पूर्ण झाली होती. ही मराठी ताकद सरकारसमोर मांडायची होती. आता हा विजय मेळावा निश्चितच साजरा केला जाईल. राज ठाकरे आज आपली भूमिका स्पष्ट करतील. या दोन प्रमुख नेत्यांसोबत मोर्चात सहभागी होणारे सर्व घटक यामध्ये सामील होतील. ही लढाई कोणाला दूर ठेवून नव्हे, तर सगळ्यांना एकत्र घेऊनच लढायची आहे.

फडणवीसांचा खोटा दावा – राऊतांचा आरोप

त्रिभाषा सूत्राच्या अहवालासंदर्भात फडणवीस यांनी ‘तो अहवाल उद्धव ठाकरे मुख्यमंत्री असताना स्वीकारण्यात आला’ असा दावा केला होता. यावर पलटवार करताना संजय राऊत म्हणाले, “फडणवीस खोटं बोलत आहेत. जसं मोदी-शाह दिल्लीत खोटं बोलतात, तसंच फडणवीस राज्यात बोलतात. माशेलकर अहवाल टेबलावर ठेवा. हवेत बाण सोडू नका. नरेंद्र जाधव अभ्यासगट स्थापन केला का? मंत्रीमंडळ आणि मुख्यमंत्री निर्णय घेताना तज्ज्ञांचा सल्ला घेतात. त्यामुळे समिती स्थापन केली जाते. हे सरकार मराठी माणसाच्या विश्वासाशी खेळ करत आहे.”

नागपूर 30 : (२९-६-२०२५) महाराष्ट्र अंधश्रद्धा निर्मूलन समितीचा जिल्हा प्रेरणा मेळावा दर चार महिन्यांनी येत असतो. नुकतीच शहादा येथील राज्य कार्यकारिणीची तीन वर्षाकरिता निवड झाल्यानंतर नागपूर जिल्ह्यामध्ये प्रेरणा मेळाव्याचे जिल्हास्तरीय आयोजन करण्यात आले.
यावेळी नागपूर विभागीय राज्य उपाध्यक्ष पदावर संजय शेंडे यांची निवड झाल्याच्या सन्मानार्थ जिल्हा अध्यक्ष जगजीत सिंग, राज्य प्रधान सचिव गजेंद्र सुरकार, जिल्हा उपाध्यक्ष मधुकर धंदरे, सेवकराम राऊत यांच्या उपस्थितीमध्ये शाल पुष्पगुच्छ व पुस्तके देऊन सत्कार करण्यात आला. प्रास्ताविक पर भाषणामध्ये जिल्हा कार्याध्यक्ष गौरव आळणे यांनी जिल्ह्यातील मागील चार महिन्यात झालेल्या उपक्रमांची माहिती दिली तर पुढील चार महिन्याचे नियोजन नियोजन करण्यात आले. तसेच शहादा येथील राज्य कार्यकारणी मध्ये झालेली निर्णय व नवनियुक्त राज्य पदाधिकाऱ्यांची माहिती दिली.
यावेळी शाखा प्रतिनिधींनी आपापल्या मात्रु शाखेमध्ये राबविण्यात आलेले उपक्रम , येणाऱ्या अडचणी, सूचना बाबत माहिती दिली.

अध्यक्षीय मनोगत व्यक्त करताना जगजीत सिंग यांनी कार्यकर्त्यांनी स्वतःच्या घराच्या दारावर अंधश्रद्धा निर्मूलन समितीची पाटी लावावी. तसेच प्रत्येक कार्यकर्त्याने  अंधश्रद्धा निर्मूलन पत्रिका मुखपृष्ठाचे सभासद बनण्याचे आव्हान केले.
बैठकीला जिल्हा विभाग प्रमुख अशोक पाटील, मालती वराडे, रवींद्र राऊत, पृथ्वीराज शाम, मनोहर कापसे, संजय भलमे, शाखा पदाधिकारी संजय लाडे, संजय भुरे, ताराचंद पखिडे, केवळराम वानखेडे, बबन गायकवाड, विलास भालेराव, सुधा बामनपल्लीवार, दीपिका अडागळे, यथार्थ आडागळे,  ईश्वर डहाके, दिवाकर शिर्के, अनिल डोंगरे, चंद्रशेखर पाटील, रजनी सुरकार, संजय रेवतकर उपस्थित होते. बैठकीचे संचालन जिल्हा प्रधान सचिव विनोद वि पवार यांनी केले तर आभार जिल्हा युवा कार्यवाह मनीषा आढागळे यांनी मानले.

रामटेक 30 :- रामटेक तालुका शिक्षकेत्तर संघटनेची सभा नुकतीच पार पडली. यावेळी नवनियुक्त पदाधिकाऱ्यांचा पदग्रहन कार्यक्रम घेण्यात आला.  सदर सभा महाकवी कालिदास सहकारी पतसंस्था, रामटेक,नगर परिषद, रामटेकच्या कार्ययालयात संपन्न झाली. कार्यक्रमाचे अध्यक्षस्थानी रामटेक तालुका शिक्षकेत्तर सेवक संघाचे अध्यक्ष सुनिल जैयस्वाल होते. प्रमुख पाहूने जिल्हा संघटनेचे पदाधिकारी उमेश शेंडे,मनोज पराते,राकेश उमरेडकर, सतीष दहाट,कैलास निघोट आदी उपस्थीत होते. यावेळी शिक्षकेत्तर कर्मचाऱ्यांच्या अडचणी व समस्यांवर सविस्तर चर्चा करण्यात आली. यावेळी तालुक्यातील पदाधिकारी व कर्मचारी मोठ्या संख्येने उपस्थीत होते. कार्यक्रमाचे संचालन सुरेश हलमारे यांनी तर आभार आनंद वाडिवे यांनी मानले. कार्यक्रमास कार्यक्रमाचे यशस्वीकरीता तालुक्यातील सर्व शिक्षकेत्तर कर्मचाऱ्यांनी परीश्रम घेतले

तृतीय भाषेसंदर्भातील दोन्ही शासन निर्णय रद्द

पावसाळी अधिवेशनात12 विधेयके

अधिवेशनात सविस्तर चर्चा करुन जनतेचे प्रश्न सोडविणार

लाडकी बहीण योजनेच्या पुढील हप्त्यासाठी3600 कोटी मंजूर

मुंबई, 30 – राज्यात सर्व माध्यमांच्या शाळांमध्ये पहिलीपासून मराठी भाषा सक्तीची आहे. राष्ट्रीय शैक्षणिक धोरणाप्रमाणे त्रिभाषा सूत्राबाबत सांगोपांग अभ्यास करुन तसेच भविष्यात महत्वाच्या ठरणाऱ्या अकॅडेमिक बँक ऑफ क्रेडिटचे महत्त्व विचारात घेऊन विद्यार्थी हिताचा निर्णय घेण्यासाठी डॉ. नरेंद्र जाधव यांच्या अध्यक्षतेखाली समिती स्थापन करण्याचा निर्णय घेण्यात आल्याचे मुख्यमंत्री देवेंद्र फडणवीस यांनी सांगितले. या समितीचा अहवाल येईपर्यंत तृतीय भाषा संदर्भातील काढण्यात आलेले दोन शासन निर्णय रद्द करण्यात येत असल्याचेही ते म्हणाले.

विधिमंडळाच्या पावसाळी अधिवेशनास उद्या दिनांक 30 जून पासून मुंबई येथे सुरुवात होत आहे. या पार्श्वभूमीवर आज मंत्रिमंडळाच्या बैठकीनंतर मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार यांनी सह्याद्री अतिथीगृह येथे माध्यम प्रतिनिधींशी संवाद साधला. त्यावेळी मुख्यमंत्र्यांनी ही माहिती दिली. यावेळी मंत्रिमंडळातील सदस्य उपस्थित होते.मुख्यमंत्री म्हणाले, राज्याला विकासाकडे नेण्याच्या दिशेने राज्य सरकार काम करीत आहे. या अधिवेशनामध्ये सर्वसामान्य जनतेचे प्रश्न मार्गी लागावेत यासाठी सविस्तर चर्चा करण्याच्या उद्देशाने शासनाने तीन आठवड्यांचे अधिवेशन प्रस्तावित केले आहे. या अधिवेशनात एकूण 12 विधेयके सादर होणार असून प्रलंबित असलेले एक विधेयक आणि संयुक्त समितीकडील एक विधेयकावर देखील चर्चा होईल. त्याचबरोबर सहा अध्यादेश पटलावर ठेवले जातील. राज्यात जून महिन्यातील पावसाची स्थिती समाधानकारक असून पेरण्या देखील चांगल्या झाल्याची माहिती त्यांनी दिली. शेतकऱ्यांसाठी मुबलक प्रमाणात बियाणे आणि खतांच्या उपलब्धतेसाठी यंत्रणा काम करीत असून काही ठिकाणी असलेल्या तक्रारी दूर करण्यात येत असल्याचे त्यांनी सांगितले.

नागरिकांचे प्रश्न सोडविण्यावर शासनाचा भर – उपमुख्यमंत्री एकनाथ शिंदे

राज्य शासन जनभावनेचा आदर करणारे असून सर्वसामान्यांचे प्रश्न सोडविण्यावर राज्य शासनाचा भर असल्याचे उपमुख्यमंत्री एकनाथ शिंदे यांनी यावेळी सांगितले. महाराष्ट्र राज्य हे स्टार्टअप, जीडीपी, विदेशी गुंतवणूक आदी बाबींमध्ये अग्रेसर आहे. आतापर्यंत डावोस मध्ये 20 लाख कोटींचे सामंजस्य करार झाले असून त्यापैकी 70 ते 80 टक्क्यांची प्रत्यक्ष प्रक्रिया सुरू झाली असल्याचे ते म्हणाले. विकसित भारताच्या उद्देश पूर्तीमध्ये महाराष्ट्र पुढे असल्याचेही त्यांनी नमूद केले.

राज्यात पहिलीपासून मराठी भाषा सक्तीची असल्याचे सांगून हिंदी भाषेची सक्ती नसल्याचे त्यांनी स्पष्ट केले. डॉ.नरेंद्र जाधव यांच्या अध्यक्षतेखालील समिती विद्यार्थी हित लक्षात घेऊन निर्णय घेईल, असा विश्वास त्यांनी व्यक्त केला. नानाजी देशमुख कृषी संजीवनीच्या दुसऱ्या टप्प्याला शासनाने मान्यता दिल्याची माहिती त्यांनी यावेळी दिली.

लाडकी बहीण योजनेच्या पुढील हप्त्यासाठी 3600 कोटी – उपमुख्यमंत्री अजित पवार

महिला सक्षमीकरणासाठी राज्य शासनामार्फत लाडकी बहीण योजना राबविली जात आहे. या लाडक्या बहिणींकरिता 3600 कोटींचा निधी मंजूर करण्यात आला असून उद्यापासून त्यांच्या खात्यावर रक्कम जमा होईल, असे उपमुख्यमंत्री अजित पवार यांनी पत्रकार परिषदेत बोलताना सांगितले. उपमुख्यमंत्री पवार म्हणाले, राज्य विधिमंडळाचे पावसाळी अधिवेशन उद्यापासून सुरू होत आहे.  अधिवेशनात सादर होणाऱ्या  प्रत्येक विधेयकावर सखोल चर्चा व्हावी, कोणतेही विधेयक चर्चेशिवाय मंजूर होऊ नये, अशी शासनाची भूमिका राहील. विधिमंडळ सदस्यांना त्यांच्या मतदारसंघांतील प्रश्न मांडण्यासाठी पुरेसा वेळ दिला जाईल आणि सभागृहाचा एकही मिनिट वाया जाणार नाही याचीही दक्षता घेतली जाईल. उद्यापासून तीन आठवड्यांच्या पावसाळी अधिवेशनात सादर होणाऱ्या पुरवणी मागण्यांना मंत्रिमंडळाने मान्यता दिली असून उद्या त्या सभागृहात सादर केल्या जातील, अशी माहिती त्यांनी दिली. उपमुख्यमंत्री  पवार म्हणाले, यंदा प्रथमच जून महिन्यात चांगला पाऊस झाल्याने राज्यातील धरणाच्या पाणीसाठ्याची स्थिती चांगली आहे. तर राज्यात काही ठिकाणी पावसामुळे नुकसान झाले आहे. या नुकसानीचे पंचनामे करण्याचे आदेश  देण्यात आले असून राज्य शासन बळीराजाच्या पाठीशी खंबीरपणे उभे असल्याचेही त्यांनी सांगितले.