कामठी तालुका वार्तापत्र
संदीप कांबळे,कामठी :- नागपूर शहराच्या वाढत्या विस्ताराचा परिणाम कामठी तालुक्यातील ग्रामीण भागावरही स्पष्टपणे जाणवू लागला आहे. शहरालगतची घोरपड, लिहिगाव, आजनी, गादा, पावनगाव आदी गावे झपाट्याने शहरीकरणाच्या दिशेने वाटचाल करीत असल्याने या परिसरातील जमिनींना मोठी मागणी निर्माण झाली आहे. भविष्यात या भागात निवासी व व्यावसायिक वस्ती वाढण्याच्या शक्यतेने कामठी तालुक्यातील बहुतांश तरुणांना भूखंड खरेदी-विक्री व प्लॉटिंग व्यवसायाचे वेध लागले आहेत.
पूर्वी शेतीप्रधान असलेल्या या गावांच्या परिसरात आता रस्ते, वाहतूक, नागरी सुविधा, शैक्षणिक संस्था आणि विविध व्यावसायिक उपक्रम वाढत आहेत. त्यामुळे शहरापासून काही अंतरावर असलेले भूखंड भविष्यातील गुंतवणुकीसाठी आकर्षणाचे केंद्र बनत आहेत. कमी कालावधीत चांगला परतावा मिळण्याची अपेक्षा आणि वाढत्या जमिनीच्या दरामुळे अनेक तरुण या व्यवसायाकडे वळताना दिसत आहेत.
शहर विस्तारामुळे जमिनीला वाढती मागणी
कामठी शहराची वाढती लोकसंख्या आणि नागपूरच्या दिशेने होत असलेला शहरी विस्तार यामुळे शहरालगतच्या गावांमध्ये निवासी वसाहतींची मागणी वाढत आहे. घोरपड, लिहिगाव, आजनी, गादा, पावनगाव यांसह परिसरातील अनेक गावांमध्ये शेतजमिनींच्या आजूबाजूला नवीन वसाहती उभ्या राहत आहेत. त्यामुळे भविष्यातील विकासाचा अंदाज घेत काही तरुणांकडून जमिनींची माहिती घेणे, ग्राहक शोधणे आणि भूखंड विक्रीचे नेटवर्क उभारणे सुरू झाले आहे.
तरुणांची भूमिका बदलली
नोकरीच्या पारंपरिक संधींपेक्षा स्वतःचा व्यवसाय उभारण्याकडे तरुणांचा कल वाढत आहे. भूखंड व्यवसायात स्थानिक परिसराची माहिती, ग्राहकांशी संपर्क आणि मार्केटिंग कौशल्य यांचा उपयोग होत असल्याने अनेक तरुण या क्षेत्रात उतरले आहेत. काही जण स्वतः गुंतवणूक करीत आहेत, तर काही जण जमीनमालक आणि ग्राहक यांच्यातील दुवा म्हणून काम करीत आहेत.
सोशल मीडिया आणि ऑनलाइन जाहिरातींमुळे या व्यवसायाला आणखी चालना मिळाली आहे. विविध भूखंडांचे लोकेशन, आकार, रस्त्याची उपलब्धता आणि अपेक्षित दर यांची माहिती ग्राहकांपर्यंत सहज पोहोचविली जात आहे.
शहरीकरणामुळे जमिनीच्या किमतीत बदल
शहरालगतच्या गावांमध्ये शहरीकरणाचा वेग वाढल्याने जमिनीच्या बाजारभावातही बदल होत असल्याचे चित्र आहे. भविष्यात रस्ते रुंदीकरण, नागरी सुविधा आणि नवीन वसाहती निर्माण झाल्यास या परिसरातील जमिनींना आणखी मागणी वाढण्याची शक्यता व्यक्त केली जात आहे. याच अपेक्षेने काही तरुण भविष्यातील संभाव्य विकास क्षेत्रांचा अभ्यास करून गुंतवणुकीच्या संधी शोधत आहेत.
मात्र नियमांचे पालन आवश्यक
भूखंड व्यवसायात संधी असली तरी कायदेशीर बाबींची पूर्ण माहिती घेणे अत्यंत आवश्यक आहे. जमीन खरेदी-विक्री किंवा प्लॉटिंगपूर्वी मालकी हक्क, सातबारा उतारा, फेरफार नोंदी, जमीन वापराचा प्रकार, मोजणी, रस्ता हक्क, संबंधित प्राधिकरणांच्या परवानग्या आणि इतर आवश्यक कागदपत्रांची पडताळणी करणे गरजेचे आहे.
केवळ भविष्यात जमीन महागेल या अपेक्षेने मोठी गुंतवणूक करणे धोकादायक ठरू शकते. त्यामुळे तरुणांनी अनुभवी व्यक्ती तसेच कायदेशीर तज्ज्ञांचा सल्ला घेऊनच व्यवहार करणे आवश्यक आहे.
शहरीकरणाच्या उंबरठ्यावर गावांची नवी ओळख
घोरपड, लिहिगाव, आजनी, गादा, पावनगाव आदी गावे सध्या शहरीकरणाच्या उंबरठ्यावर असल्याने आगामी काळात या भागाच्या आर्थिक आणि सामाजिक स्वरूपात मोठे बदल होण्याची शक्यता आहे. शेतीप्रधान भागातून निवासी व व्यावसायिक क्षेत्राकडे होत असलेला हा प्रवास स्थानिक तरुणांसाठी रोजगार आणि व्यवसायाच्या नव्या संधी निर्माण करणारा ठरू शकतो.
मात्र या बदलाचा फायदा स्थानिक नागरिकांना दीर्घकाळ मिळण्यासाठी नियोजित विकास, मूलभूत सुविधा, योग्य रस्ते, पाणी, वीज, स्वच्छता आणि पर्यावरणाचा समतोल याकडेही प्रशासनाने गांभीर्याने लक्ष देणे गरजेचे आहे. शहरीकरणाच्या वाढत्या प्रक्रियेत भूखंड व्यवसायासोबत नियोजनबद्ध विकासाला प्राधान्य दिल्यास कामठी तालुक्यातील शहरालगतची गावे भविष्यात महत्त्वाची निवासी व व्यावसायिक केंद्रे म्हणून विकसित होऊ शकतात.